নাজিৰাত প্ৰহসনত পৰিণত জলজীৱন মিছন : এটুপি খোৱাপানীৰ বাবে হাহাঁকাৰ : ক্ষোভিত জনগণে আজি ঘেৰাও কৰিলে জনস্বাস্থ্য কাৰিকৰী বিভাগৰ কাৰ্যালয় :

নিউজডেক্স,১২জুন,২০২৪ :প্ৰধানমন্ত্ৰী জলজীৱন মিছনৰ আঁচনিৰ জৰিয়তে ঘৰে ঘৰে বিশুদ্ধ খোৱাপানী যোগানৰ  জয়ঢোল কোবাই থকা অৱস্থাতে সেই আঁচনিখন নাজিৰাত  চৰম প্ৰহসনত পৰিণত হৈছে ৷ বিগত প্ৰায় তিনি মাহধৰি বি জে পি নেৰ্তৃত্বাধীন নাজিৰা পৌৰসভাই নগৰবাসীক যোগান ধৰিব পৰা নাই বিশুদ্ধ খোৱাপানী ।নাজিৰা পৌৰসভাৰ পৰা পৰিচালিত আৰু নাজিৰা জনস্বাস্থ্য কাৰিকৰী বিভাগৰ জৰিয়তে নগৰবাসীক বিশুদ্ধ খোৱাপানী যোগান ধৰে যদিও মটৰ আৰু টেংকীৰ   বিজুতি হোৱাৰ বাবে আজি তিনিমাহ ধৰি যোগান ধৰা নাই খোৱাপানী । যাৰ বাবে নগৰবাসী সৰ্বসাধাৰণ জনগণে ব্যাপক সমস্যাৰ সম্মুখীন হৈ আহিছে । বিশুদ্ধ খোৱাপানীৰ পৰা বঞ্চিত নাজিৰা নগৰৰ একাংশ জনগণে আজি নাজিৰা জনস্বাস্থ্য কাৰিকৰী বিভাগৰ কাৰ্যালয় ঘেৰাও কৰি প্ৰতিবাদেৰে ক্ষোভ উজাৰে । সমস্যা সমাধান বিচাৰি জনগণে আবেদনলৈ পৌৰসভা কৰ্তৃপক্ষৰ ওচৰলৈ গলে পৌৰকৰ্তৃপক্ষই জনস্বাস্থ্য কাৰিকৰী বিভাগলৈ দায়িত্ব ঠেলা মাৰে আৰু জনস্বাস্থ্য কাৰিকৰী বিভাগলৈ  গলে নাজিৰা পৌৰসভালৈ দায়িত্ব ঠেলে । এনে দলিয়া – দলি মন্তব্যৰে দায় সাৰিব বিছৰা পৌৰ প্ৰশাসক আৰু নাজিৰা জনস্বাস্থ্য কাৰিকৰী বিভাগৰ চৰম অকমন্যতাৰ বাবে বিশুদ্ধ খোৱাপানীৰ পৰা বঞ্চিত জনগণে অৱশেষত কাৰ্যালয়ৰ সন্মূখত অৱস্থান কৰি কাৰ্যালয় ঘেৰাও জৰিয়তে প্ৰতিবাদ সাব্যস্ত কৰিবলৈ বাধ্য হয় ।