নিউজডেক্স,২২জুলাই ,২০২৫:বৰ্তমান ৰাজ্য চৰকাৰে অবৈধ বেদখলৰ বিৰুদ্ধে উচ্ছেদ অভিযান অব্যাহত ৰখাৰ সময়তে নাজিৰা চহৰৰ মাজমজিয়াত অৱস্থিত চৰকাৰী চিকিৎসালয়ৰ ভূমি বেদখল কৰি থকা এগৰাকী মহিলাৰ আবেদন গুৱাহাটী উচ্চন্যায়ালয়ে বহু বছৰৰ আগতে নাকচ কৰাৰ পিছতো প্ৰায় দুই দশকৰ অধিক কাল ধৰি এই বিষয়টোৰ সুমিমাংসা কৰাত ব্যৰ্থ হৈছে চিকিৎসালয় কৰ্তৃপক্ষ তথা প্ৰশাসন৷উল্লেখ্য যে নাজিৰা নগৰৰ সোঁমাজত থকা এই চৰকাৰী সহাৰ্যপ্ৰাপ্ত ৰাজ্যিক চিকিৎসালয় খনলৈ চিকিৎসাজনিত কাৰণত নগৰখনৰ লগতে উপকণ্ঠীয় অঞ্চলৰ লোকৰ আগমণ ঘটে আৰু ইয়াক এক পূৰ্ণাংগ স্বাস্থ্য কেন্দ্ৰলৈ উন্নীত কৰিবৰ বাবে স্থানীয় ৰাইজে দীৰ্ঘদিন ধৰি দাবী উণ্থাপন কৰি আহিছে৷এই চিকিৎসালয়ৰ চৌহদত প্ৰয়োজনীয় ভৱন নিৰ্মাণ কৰি ৰাইজক উন্নত চিকিৎসা সেৱা প্ৰদান কৰিব পৰাৰ থল আছে যদিও চিকিৎসালয় খনৰ ভূমি আনক বেদখল কৰিবলৈ এৰি দিয়া ইয়াৰ পৰিচালনা সমিতি তথা চৰকাৰ এইক্ষত্ৰত ৰহস্যজনক ভাবে নিমাত৷সাধাৰণতে ৰাজনৈতিক দৃষ্টভংগীৰে কাৰোবাক সংস্থাপিত কৰিবৰ বাবেই কোনো বাদ বিচাৰ নোহোৱাকৈ গঠন কৰা পৰিচালনা সমিতিৰ দুৰ্বলতা তথা নিস্ক্ৰিয়তাৰ বাবেই এই চিকিৎসালয় খনৰ ভূমি আনে বেদখল কৰাৰ সুবিধা পাইছে বুলি ৰাইজে মতপোষণ কৰিছে৷নাজিৰা মৌজাৰ অধীনস্থ জাংগুল বাৰি গ্ৰাণ্টৰ দাগ নং ৫৭১ আৰু প্লট নং ৫১ আৰু ৫২ ৰ দ্বাৰা সামৰি লোৱা ৪ বিঘা,১ কঠা আৰু ১৩ লোচাৰ মাটিত ১৯৪৪ চনত নাজিৰা হাস্পতাল নামেৰে জনাজাত এই স্বাস্থ্য কেন্দ্ৰটো স্থাপন কৰা হৈছিল। পাৰ্বতী কৰ্মকাৰ ৰাভা নামৰ মহিলা গৰাকীয়ে দাবী কৰে যে তেওঁ ৩ কঠা ৬ লোচৰ মাটিৰ এটা প্লটৰ গৰাকী কিন্তু প্ৰকৃততে এই বিবদমান ৩ কথা ৬ লোচা মাটি হস্পিতালখনৰ মাটিৰে এটা অংশ৷স্বাস্থ্যকেন্দ্ৰটো থকা ৪ বিঘা,১ কঠা আৰু ১৩ লোচাৰ এই ভূমিখিনি মূলতঃ অসম কোম্পানীৰ।অসম কোম্পানীয়ে এই মাটিখিনি স্বাস্থ্যকেন্দ্ৰ টোক লিজত দিছিল আৰু এই কথা অসম কোম্পানী আৰু অ’ এন জি চিৰ মাজত ৩০/১২/১৯৬৮ তাৰিখে কাৰ্যকৰী কৰা বিক্ৰীৰ চুক্তিটো উল্লেখ কৰা আছে৷পাৰ্বতী কৰ্মকাৰ ৰাভা এই স্বাস্থ্য কেন্দ্ৰৰ চতুৰ্থ শ্ৰেণীৰ কৰ্মচাৰী সুখদেৱ কৰ্মকাৰৰ কন্যা ৷ চিকিৎসালয় খনৰ চকিদাৰ ৰূপে কাম কৰা সুখদেৱক স্বাস্থ্যকেন্দ্ৰটোৰ চৌহদৰ চৰকাৰী কোৱাৰ্টাৰত থাকিবলৈ দিয়া হৈছিল যদিও সুখদেৱে ১৯৯৭ চনত অৱসৰ গ্ৰহণ কৰাৰ পিছত এই কোৱাৰ্টাৰটো খালী কৰা নাছিল। সেই সময়ত অৰ্থাৎ ১৯৯৭ চনৰ পৰা চিকিৎসালয় খনত কৰ্মৰত চিকিৎসা বিষয়া আৰু পৰিচালনা সমিতিৰ দুৰ্বলতাৰ বাবেই আৰু এনেকৈ গোজেই গজালিত পৰিণত হ’ল৷নব্বৈৰ দশকৰ শেষৰ ফালে পাৰ্বতী কৰ্মকাৰে অসম ভাড়াতীয়া আইনৰ অধীনত শিৱসাগৰৰ সহকাৰী আয়ুক্ত(ADC)ৰ ওচৰত এই মাটিৰ ৩ কঠা আৰু ৬লোচা জমিৰ মালিকীস্বত্ব প্ৰদানৰ বাবে আবেদন দাখিল কৰিছিল আৰু সহকাৰী আয়ুক্তই নাজিৰাৰ ৰাজহ চক্ৰ বিষয়াৰ পৰা প্ৰতিবেদন লাভ কৰাৰ পিছত পাৰ্বতীক সাময়িক পুট্টা প্ৰদান কৰাৰ নিৰ্দেশ দিছিল।অৱশ্যে ২০০০ চনৰ ২৭ জুনত সহকাৰী আয়ুক্তই ১৯৯৯ চনৰ ৭ জানুৱাৰীত দিয়া তেওঁৰ আদেশ পুনৰীক্ষণ কৰি মানৱীয়তাৰ ভিত্তিত পাৰ্ব তী কৰ্মকাৰক মাত্ৰ ৪ লোচা মাটিৰ বাবেহে সময়িক পট্টা দিয়াৰ নিৰ্দেশ দিয়ে ৷ ইয়াৰ পিছতে পাৰ্বতী কৰ্মকাৰে অসম ৰাজহ ব’ৰ্ডৰ গুৱাহাটীস্থ আদালতলৈ যায় আৰু সহকাৰী আয়ুক্তৰ ২৭ জুন২০০০ৰ আদেশক প্ৰত্যাহ্বান জনায় ৷৩ জানুৱাৰী,২০০১ তাৰিখে ৰাজহ আদালতে পাৰ্বতীৰ আবেদন খাৰিজ কৰি আপীলকাৰীক দেৱানী আদালতৰ কাষ চাপিবলৈ কোৱাৰ লগতে সহকাৰী আয়ুক্তই এনেদৰে পাৰ্বতী কৰ্মকাৰক ভূমি পট্টা প্ৰদান কৰাৰ নিৰ্দেশ দিয়াৰ অধিকাৰ নাই বুলি কয়৷ ইয়াৰ পিছত পাৰ্বতী কৰ্মকাৰে বিষয়টো শিৱসাগৰৰ দেৱানী ন্যায়াধীশ(জ্যেষ্ঠ বিভাগ)ৰ আদালতলৈ লৈ যায়। ২০০১ চনৰ ৩০ মাৰ্চত আদেশ প্ৰদান কৰি শিৱসাগৰৰ দেৱানী ন্যায়াধীশ জি কে দত্তই পাৰ্বতীৰ আবেদন নাকচ কৰি কয় যে “আবেদনকাৰীয়ে নিষেধাজ্ঞা প্ৰদানৰ বাবে প্ৰাইমা ফেচি গোচৰ ৰুজু কৰাত ব্যৰ্থ হৈছে”।অৱশেষত ,পাৰ্বতীয়ে বিষয়টো সন্দৰ্ভত গুৱাহাটী উচ্চ ন্যায়ালয়লত ৰীট আবেদন দাখিল কৰে যদিও ২০০৩ চনৰ ২০ মে’ত উচ্চ ন্যায়ালয়ৰ ন্যায়াধীশ পি জি আগৰৱালে পাৰ্বতীৰ ৰিট আবেদন খাৰিজ কৰে। আনহাতে আদালতৰ স্পষ্ট নিৰ্দেশ আৰু জনসাধাৰণৰ দাবীৰ পিছতো চিকিৎসালয় কৰ্তৃপক্ষই পাৰ্বতী কৰ্মকাৰৰ পৰা চিকিৎসালয়ৰ ভূমি আজিওউদ্ধাৰ কৰিব পৰা নাই। পাৰ্বতী কৰ্মকাৰে বেদখল কৰা চিকিৎসালয়খনৰ উক্ত ভুমি দ’চানেকীয়া হোৱাৰ বাবে পূৰ্বতে স্বাস্থ্যকেন্দ্ৰটোৰ বৰ্জিত পানী সমূহ এই ভূমিতেই জমা হৈছিল৷ কিন্তু বেদখলকাৰীয়ে উক্ত স্থান মাটি ভৰাই ওখ কৰাৰ ফলশ্ৰুতিত বৰ্তমান এজাক ডাঙৰ বৰষুণ দিলেই চিকিৎসালয় খনৰ চৌহদত কৃত্ৰিম বান পানীৰ সৃষ্টি হৈ ইয়াৰ সকলো ভৱনেই প্ৰদূষিত পানীত বুৰ গৈ সমগ্ৰ চিকিৎসালয় খনেই অচল হৈ পৰে৷আমি এই বিষয়ত আৰু অধিক তথ্য বিচাৰি চিকিৎসালয় কৰ্তৃপক্ষৰ লগত বাৰম্বাৰ যোগোযোগ কৰাৰ পিছতো তেওঁলোকে আমাক এই বিষয়ে একো নজনোৱাটো অতি দুৰ্ভাগ্যজনক কথা৷কৰ্তৃপক্ষৰ সদিচ্ছাৰ অভাৱ আৰু পৰিচালনা সমিতিৰ দুৰ্বলতাৰ বাবেই চিকিৎসালয়খনৰ বহুমূলীয়া ভূমি এনেদৰে বেদখলৰ কবলত পৰিছে ,যাৰ বাবে ভবিষ্যতে এই চিকিৎসালয় খন সম্প্ৰসাৰণৰ ক্ষেত্ৰত বহু বাধা সৃষ্টি হোৱাৰ আশঙ্কা আছে৷ নাজিৰাৰ জনসাধাৰণে চিকিৎসালয়খনৰ সামূহিক উন্নতিৰ স্বাৰ্থত অতি শীঘ্ৰেই এই বেদখল উচ্ছেদ হোৱাটো বিচাৰিছে৷উন্নয়নৰ ফটাঢোল বজাই জাতি-মাটি-ভেটি ৰক্ষাৰ নামত ৰাজ্যৰ বিভিন্ন স্থানত উচ্ছেদ চলাই থকা চৰকাৰখনে নাজিৰাৰ এই চৰকাৰী চিকিৎসালয়ৰ ভূমি বেদখল মুক্ত কৰাৰ বাবে চেষ্টা কৰিবনে বাৰু?
