প্ৰদূষণৰ প্ৰমাণ পত্ৰ অবিহনে শিৱসাগৰ,নাজিৰাত চলি আছে বহু ইটা ভাটা আৰু শিল ভঙা মেচিন : নিদ্ৰাৰত প্ৰদূষণ নিয়ন্ত্ৰণ পৰিষদ

নিউজডেক্স,১৬জানুৱাৰী ২০২৬ :  বায়ু,পানী আৰু মাটিৰ প্ৰদূষণ ৰোধ বা নিয়ন্ত্ৰণৰ বাবে অসমৰ যিকোনো স্থানত সৰু বৰ বিভিন্ন উদ্যোগ স্থাপনৰ ক্ষেত্ৰত অসম প্ৰদূষণ নিয়ন্ত্ৰণ পৰিষদে ক্ষেত্ৰ ভিত্তিক অনুসন্ধানৰ দ্বাৰা কোনো উদ্যোগ স্থাপনৰ সন্মতি(Consent to Establish চমুকৈ CTE) পত্ৰ প্ৰদান কৰাৰ পিছত পুনৰ পৰিদৰ্শন কৰি সংশ্লিষ্ট উদ্যোগটো চলাবৰ বাবে সন্মতি (Consent to Operate চমুকৈ CTO) প্ৰদান কৰে৷ এই চি টি অ’ পোৱাৰ পিছতহে যিকোনো উদ্যোগে নিজৰ ব্যৱসায়িক উৎপাদন আৰম্ভ কৰে৷উল্লেখ্য যে দেশৰ জল(সংৰক্ষণ আৰু প্ৰদূষণ নিয়ন্ত্ৰণ) আইন ১৯৭৪ৰ অধীনত গঠিত ৰাজ্যিক প্ৰদূষণ নিয়ন্ত্ৰণ পৰিষদ ১৯৮১চনৰ বায়ু(সংৰক্ষণ আৰু প্ৰদূষণ নিয়ন্ত্ৰণ) আইনৰ দ্বাৰাও পৰিচালিত হয়৷ৰাজ্যৰ বায়ু,পানী আৰু শব্দ প্ৰদূষণৰ মান নিৰূপণ আৰু নিয়ন্ত্ৰণৰ বাবে অসমৰ প্ৰায়বোৰ জিলাতে অসম চৰকাৰৰ বন,পৰিবেশ আৰু জলবায়ু পৰিৱৰ্তন বিভাগৰ অধীনত অসম প্ৰদূষণ নিয়ন্ত্ৰণ পৰিষদৰ গৱেষণাগাৰ বা কাৰ্যালয় আছে৷