মে-ডাম-মে-ফিত টাই গীত নৃত্য পৰিৱেশন নাজিৰা টাই সাংস্কৃতিক কেন্দ্ৰত

ভাস্কৰজ্যোতি বৰগোহাঞি, নাজিৰাঃ৩ ফেব্ৰুৱাৰীঃনাজিৰা নগৰৰ ১ নং ৱাৰ্ডত অৱস্থিত টাই আহোম সাংস্কৃতিক কেন্দ্ৰত বানফী পূজাৰে যাথাবিহিত ভাৱে উপৰিপুৰুষলৈ তৰ্পণ আগবঢ়াই পৱিত্ৰ মে-ডাম মে-ফি পালন কৰা হয় । দিনটোৰ বিস্তৃত কাৰ্য্যসূচীত পুৱা পতাকা উত্তোলণ কৰে সাংস্কৃতিক কেন্দ্ৰটোৰ সভাপতি বিষ্ঞু বৰুৱাই । ছাত্ৰ-ছাত্ৰীৰ মাজত চিত্ৰাংকন, কবিতা আবৃতি, মহিলা সকলৰ মাজত মিউজিক চেয়াৰ আদি প্ৰতিযোগিতা অনুষ্ঠিত হয় । টাই ভাষী গীত, টাই নৃত্য পৰিৱেশন কৰে যুৱক যুৱতী সকলে । মুকলি সভাৰ সভাপতিত্ব কৰে বিষ্ঞু বৰুৱাই । টাই ভাষী সমদল গীতেৰে সভা মুকলি কৰা হয় । সভাত বিশিষ্ট বক্তা ৰূপে প্ৰদীপ ম’ছাম ফুকনে মে-ডাম মে-ফিত উপৰি-পুৰুষ আৰু প্ৰকৃতিৰ প্ৰতি প্ৰাৰ্থনাৰে সমাজৰ কল্যাণ আৰু মানৱীয় সম্প্ৰীতিৰ উপলব্ধি জ্ঞানক জাগ্ৰত কৰা হয়   বুলি উল্লেখ কৰে ।  অ’ এনজিচিৰ অৱসৰপ্ৰাপ্ত বিষয়া অৰুণ কোঁৱৰ, শিক্ষক অৰুণ কোঁৱৰ, প্ৰহ্লাদ বৰগোহাঁই, লক্ষীৰাম লাচিত, নিলীমা গগৈ, লক্ষীন্দ্ৰ ৰাজখোৱা, ভাস্কৰজ্যোতি বৰগোহাঁই আদিয়ে বক্তব্য দাঙি ধৰে । সভাত নিবেদিতা ফুকন, প্ৰণীতা লাচিতে গীত পৰিৱেশন কৰে ।