অসমৰ প্ৰাক্তন ৰাজ্যপাল লেফটেনেণ্ট জেনেৰেল অজয় সিঙৰ দেহাৱসান

নিউজ ডেক্স, ১৮ এপ্ৰিল ২০২৩ :  অসমৰ প্ৰাক্তন ৰাজ্যপাল লেফটেনেণ্ট জেনেৰেল অজয় সিঙৰ মঙলবাৰে পুৱা দেহাৱসান ঘটে। ২০০৩-০৮লৈ অসমৰ ৰাজ্যপাল হিচাপে কাৰ্যনিৰ্বাহ কৰা অজয় সিঙে আলফাৰ বিৰুদ্ধে ‘অপাৰেচন ৰাইনো’ৰো নেতৃত্ব দিছিল ।১৯৩৪ চনৰ ২০ নৱেম্বৰত ৰাজস্থানত জন্মগ্ৰহণ কৰা সিঙে মেয়ো কলেজ আৰু মাদ্ৰাজ বিশ্ববিদ্যালয়ত অধ্যয়ন কৰিছিল৷১৯৬৫ আৰু ১৯৭১ চনৰ ভাৰত-পাকিস্তান যুদ্ধত  সক্ৰিয় ভূমিকা পালন কৰি অদম্য সাহস আৰু বুদ্ধিমত্তাৰ পৰিচয় দিয়া লেফটেনেন্ট জেনেৰেল অজয় সিঙ উত্তৰ-পূব পৰিষদৰো অধ্যক্ষ আছিল। অসমৰ মুখ্যমন্ত্ৰী ড০ হিমন্ত বিশ্ব শৰ্মাই প্ৰাক্তন ৰাজ্যপালগৰাকীৰ মৃত্যুত গভীৰ শোক প্ৰকাশ কৰে ৷