বিশ্বৰ ক্ষুধা তালিকাত নিম্নগামী ভাৰত :২০২৩ ত ১২৫খন দেশৰ ভিতৰত যোৱা বছৰতকৈ ৪ স্থান পিছলি ১১১ নম্বৰ স্থানলৈ অৱনমিত

নিউজ ডেক্স, ১২ অক্টোবৰ,২০২৩ :গ্ল’বেল হাংগাৰ ইনডেক্স-২০২৩ত ভাৰতে ১২৫খন দেশৰ ভিতৰত ১১১ নম্বৰ স্থান লাভ কৰিছে আৰু দেশখনৰ সৰ্বাধিক শিশু অপচয়ৰ হাৰ ১৮.৭ শতাংশ বুলি  প্ৰকাশ পাইছে ৷ গ্ল’বেল হাংগাৰ ইনডেক্স (GHI) হৈছে বিশ্ব, আঞ্চলিক আৰু ৰাষ্ট্ৰীয় পৰ্যায়ত ক্ষুধাক ব্যাপকভাৱে জোখা আৰু অনুসৰণ কৰা এক আহিলা।গ্ল’বেল হাংগাৰ ইনডেক্স-২০২৩ত ২৮.৭ নম্বৰ লাভ কৰা ভাৰতত ক্ষুধাৰ এনে এক মাত্ৰা গুৰুতৰ বুলি সূচকাংকৰ ভিত্তিত প্ৰকাশিত এক প্ৰতিবেদনত প্ৰকাশ পাইছে।ভাৰতৰ চুবুৰীয়া দেশ পাকিস্তান (১০২তম), বাংলাদেশ (৮১তম), নেপাল (৬৯তম) আৰু শ্ৰীলংকা (৬০তম)ৰ এই সূচকাংকত ভাৰতৰ তুলনাত ভাল ফলাফল পোৱা গৈছে।এই তালিকাত দক্ষিণ এছিয়া আৰু আফ্ৰিকা চাহাৰাৰ দক্ষিণাঞ্চল বিশ্বৰ  ভিতৰতে সৰ্বাধিক ক্ষুধাৰ মাত্ৰা থকা অঞ্চল ৰূপে চিহ্নিত হৈছে, য’ত জিএইচআইৰ স্ক’ৰ ২৭ প্ৰতিটো, যিয়ে গুৰুতৰ ক্ষুধাৰ ইংগিত দিয়ে।আফগানিস্তান, হাইটি আৰু উপ-চাহাৰাৰ ১২খন দেশৰ জিএইচআইত প্ৰদৰ্শন ভাৰততকৈ বেয়া ।সূচকাংকৰ ওপৰত ভিত্তি কৰি প্ৰকাশিত প্ৰতিবেদনত কোৱা হৈছে যে, “ভাৰতত শিশু অপচয়ৰ হাৰ বিশ্বৰ ভিতৰতে সৰ্বাধিক, ১৮.৭ শতাংশ, যিয়ে তীব্ৰ অপুষ্টিক প্ৰতিফলিত কৰে।”এই সূচকাংক অনুসৰি ভাৰতত অপুষ্টিৰ হাৰ ১৬.৬ শতাংশ আৰু পাঁচ বছৰৰ তলৰ শিশুৰ মৃত্যুৰ হাৰ ৩.১ শতাংশ।প্ৰতিবেদনত ১৫ৰ পৰা ২৪ বছৰৰ ভিতৰৰ মহিলাৰ ৰক্তহীনতাৰ প্ৰাদুৰ্ভাৱ ৫৮.১ শতাংশ বুলিও উল্লেখ কৰা হৈছে।২০২৩ চনৰ গ্ল’বেল হাংগাৰ ইনডেক্সে (GHI) দেখুৱাইছে যে, ২০১৫ চনলৈকে বহু  উন্নতিৰ পাছতো বিশ্বজুৰি ক্ষুধাৰ বিৰুদ্ধে অগ্ৰগতি বহুলাংশে স্থবিৰ হৈ আছে।২০২৩ চনৰ জিএইচআই স্ক’ৰ বিশ্বৰ বাবে ১৮.৩, যিটো মধ্যমীয়া বুলি গণ্য কৰা হয় আৰু ২০১৫ চনৰ বিশ্বৰ জিএইচআই স্ক’ৰ ১৯.১ৰ তুলনাত এক পইণ্টতকৈও কম।তদুপৰি ২০১৭ চনৰ পৰা জিএইচআইৰ স্ক’ৰ গণনাত ব্যৱহৃত অন্যতম সূচক অপুষ্টিৰ প্ৰাদুৰ্ভাৱ বৃদ্ধি পাইছে আৰু অপুষ্টিকৰ লোকৰ সংখ্যা ৫৭২ মিলিয়নৰ পৰা প্ৰায় ৭৩৫ মিলিয়নলৈ বৃদ্ধি পাইছে বুলি সূচকাংকটোৱে প্ৰকাশ কৰিছে।হাংগাৰ ইনডেক্স ২০২২ত ভাৰতৰ ৰেংকিং আছিল ১২১খন দেশৰ ভিতৰত ১০৭ (২০২১ চনৰ ১০১ নং সূচকাংকৰ পৰা পিছলি )। প্ৰতি অক্টোবৰ মাহত  এই সূচকাংক প্ৰকাশ কৰা হয়।