নাজিৰাৰ লিগিৰী পুখুৰীত নৃশংস হত্যাকাণ্ড:হনুমানবাগ চাহ বাগিচাৰ নলাত মৃতদেহ উদ্ধাৰ

দিলিপ হাজৰিকা, ৪ মাৰ্চ, ২০২৪ :আজি নাজিৰা আদৰ্শ আৰক্ষী থানাৰ অন্তৰ্গত লিগিৰী পুখুৰীত এজন ব্যক্তিৰ মৃতদেহ উদ্ধাৰ হোৱাৰ পিছত অঞ্চলটোত চাঞ্চল্যৰ সৃষ্টি  হয় । নাজিৰা মহকুমা অসামৰিক চিকিৎসালয়ৰ নিৰ্মীয়মাণ পকী গৃহৰ যোগালী হিচাপে কৰ্মৰত উত্তৰ প্ৰদেশৰ চুমিত নামৰ যুৱকজনক যোৱা নিশা কোনো দুবৃৰ্ত্তই দাৰে বুকু , মূৰ আৰু ডিঙীত  ঘপিয়াই অতি নৃশংস ভাৱে হত্যা কৰি সমীপৰ  হনুমানবাগ চাহ বাগিচাৰ ৩ নং বি লাইনৰ নলাত পেলাই থয় । আজি পুৱা এগৰাকী মহিলাই বাগিচাৰ কাম কৰিবলৈ অহাৰ সময়ত ডিঙি ছিগি নলাত পৰি থকা মৃতদেহটো দেখি চিঞৰি  চিঞৰি অচেতন হৈ পৰাত লগে লগে  মহিলা গৰাকীক বাগিচাৰ মহৰি  আৰু শ্ৰমিকে চিকিৎসালয়লৈ নিয়াৰ লগতে নাজিৰা আদৰ্শ আৰক্ষী থানাৰ আৰক্ষীক খবৰ দিয়াত থানাৰ ভাৰপ্ৰাপ্ত বিষয়া ভৱেন দাস সহ আৰক্ষীৰ দল ঘটনাস্থলীত উপস্থিত হৈ অনুসন্ধান অব্যাহত ৰখাৰ লগতে  দণ্ডাধীশৰ উপস্থিতিত মৃতদেহটো মৰণোত্তৰ পৰীক্ষাৰ বাবে জয়সাগৰস্থ শিৱসাগৰ অসামৰিক চিকিৎসালয়লৈ  প্ৰেৰণ কৰে।