আজি হৰ্ঠাত ৰাজ্যজুৰি বিঘ্নিত হৈছে মোবাইল সেৱা : ফোনত নাই ইনকমিং আৰু আউটগয়িং সেৱা

নিউজডেক্স,২০এপ্ৰিল,২০২৪: আজি পুৱাৰ পৰাই সমগ্ৰ অসমত  মোবাইল নেটৱৰ্ক সংযোগৰ সমস্যাই দেখা দিছে৷ৰাজ্যখনৰ লোকে নিজৰ ফোন কলৰ দ্বাৰা যোগাযোগ কৰাত বহু সমস্যাৰ সন্মুখীন হ’বলগীয়া হৈছ৷ ব্যাপক মোবাইল নেটৱৰ্ক সংযোগৰ সমস্যাই  আগুৰি ধৰাৰ ফলত বিভিন্ন নেটৱৰ্কৰ মাজেৰে যোগাযোগ অসম্ভৱ হৈ পৰিছে।ৰাতিপুৱাৰ পৰাই ৰাজ্যৰ মবাইল ব্যৱহাৰকাৰীসকলে ফোন বা বাৰ্তা প্ৰেৰণ কৰিব নোৱাৰাৰ বাবে দৈনন্দিন কাম-কাজত অসুবিধা আৰু ব্যাঘাত জন্মাৰ লগতে ৰাজ্যত আজি ঘোষিত মেট্ৰিক পৰীক্ষাৰ ফলাফলৰ পিছত নিজৰ আত্মীয়ৰ ফলাফলৰ খবৰ ল’বলৈ ব্যগ্ৰ লোকৰ যোগাযোগৰ ক্ষেত্ৰতো মবাইল নেটৱৰ্কৰ বিচ্ছিন্নতাই সমস্যাৰ সৃষ্টি কৰিছে৷একেদৰে বিভিন্ন ব্যক্তিৰ পৰিয়ালৰ সদস্য, বন্ধু-বান্ধৱী আৰু সহকৰ্মীৰ সুৰক্ষা আৰু মংগলৰ খা খবৰ ল’ব নোৱাৰাত বহুতে উদ্বেগ প্ৰকাশ কৰিছে।আনহাতে সৰু- বৰ ব্যৱসায়ীৰ ব্যৱসায়তো  মোবাইল নেটৱৰ্ক সংযোগৰ অভাৱে কাৰ্য্যকলাপত বাধাৰ সৃষ্টি কৰিছে, বহুতে কামৰ সমন্বয় আৰু গ্ৰাহকৰ সৈতে যোগাযোগ কৰিবলৈ ফোন কল আৰু টেক্সট মেছেজৰ ওপৰত বহু পৰিমাণে নিৰ্ভৰ কৰে।এই পৰিস্থিতিয়ে ব্যক্তিগত আৰু পেছাদাৰী দুয়োটা কামতে মোবাইল যোগাযোগৰ ওপৰত নিৰ্ভৰশীল ৰাজ্যখনৰ বাসিন্দাসকলৰ মাজত হতাশা আৰু অসুবিধাৰ সৃষ্টি কৰিছে। অৱশ্যে ৰাজ্যখনত ইণ্টাৰনেট সেৱা এতিয়াও অব্যাহত আছে৷সমাধানৰ কোনো স্পষ্ট সময়সীমা নথকাৰ বাবে বহুতে অসহায় অনুভৱ কৰি আছে আৰু কেতিয়া স্বাভাৱিক অৱস্থা পুনৰ ঘূৰি আহিব সেই বিষয়ে নিশ্চয়তা এই পৰ্যন্ত লাভ কৰা নাই৷বহুলোকে অনুমান কৰিছে যে এই সমস্যা কাৰিকৰী ত্ৰুটি বা ৰক্ষণাবেক্ষণৰ কামৰ বাবে হ’ব পাৰে, সকলোৱেই কৰ্তৃপক্ষৰ পৰা এইক্ষেত্ৰত শ্ৰীঘ্ৰেই আনুষ্ঠানিক নিশ্চিতকৰণৰ দাবী কৰিছে।