নিউজডেক্স, ১৯ মাৰ্চ,২০২৬ :: অসমত আগন্তক বিধানসভা নিৰ্বাচনৰ বাবে প্ৰস্তুতি পূৰ্ণ গতিত আগবঢ়াৰ সময়তে এক গুৰুত্বপূৰ্ণ প্ৰশাসনিক সমস্যাই ৰাজ্যখনৰ সংবাদ কৰ্মীসকলক আক্ৰান্ত কৰা পৰিলক্ষিত হৈছে। ৰাজ্যখনৰ প্ৰায়বোৰ সমজিলাত এতিয়া নিৰ্বাচনী বিষয়াৰ কাৰ্যালয় নথকাত সমজিলা সমূহ “ঢাল তৰোৱাল বিহীন নিধিৰাম চৰ্দাৰ”ৰত পৰিণত হোৱা বুলি বহুতে অভিযোগ কৰিছে।
প্ৰাপ্ত তথ্যানুসৰি, পূৰ্বতে সমজিলা অৰ্থাৎ মহকুমা পৰ্যায়ত নিৰ্বাচন বিষয়াৰ কাৰ্যালয় থকাত স্থানীয় স্তৰতেই নিৰ্বাচন সংক্ৰান্তীয় বিভিন্ন কাম-কাজ সম্পন্ন কৰা হৈছিল। বিশেষকৈ সংবাদমাধ্যমৰ ক্ষেত্ৰত, স্থানীয় সংবাদকৰ্মীসকলক নিৰ্বাচনী প্ৰচাৰৰ বাবে প্ৰয়োজনীয় পৰিচয় পত্ৰ (পাছ)কে ধৰি অন্যান্য আনুষংগিক সা-সুবিধা সমূহ সমজিলা পৰ্যায়তেই প্ৰদান কৰা হৈছিল।
কিন্তু এইবাৰ নিৰ্বাচনৰ পূৰ্বে এই ব্যৱস্থাত পৰিবৰ্তন আনি সমজিলাৰ নিৰ্বাচনী বিষয়াৰ কাৰ্যালয় সমূহ জিলা কাৰ্যালয়ৰ সৈতে সংলগ্ন কৰাৰ ফলস্বৰূপে সমজিলা পৰ্যায়ত এই সুবিধাসমূহ সম্পূৰ্ণৰূপে বন্ধ হৈ পৰিছে।
ইয়াৰ ফলত বিশেষকৈ প্ৰান্তীয় অঞ্চলত কৰ্মৰত সংবাদসেৱীসকল বহু অসুবিধাৰ সন্মুখীন হৈছে। সমজিলা পৰ্যায়ত থকা তথ্য আৰু জনসম্পৰ্ক বিভাগৰ কাৰ্যালয়সমূহো এই পৰিবৰ্তনৰ ফলত একপ্ৰকাৰ বিভ্ৰান্তি আৰু দুমোজাত পৰা পৰিলক্ষিত হৈছে। পূৰ্বে যিসমূহ দায়িত্ব-কৰ্তব্য স্থানীয়ভাৱে সম্পন্ন কৰা হৈছিল, এতিয়া সেইবোৰ কেন্দ্ৰীয় ভাবে জিলা সদৰৰ পৰা পৰিচালিত হোৱাত প্ৰান্তীয় সংবাদ কৰ্মীৰ বাবে জটিলতা সৃষ্টি হোৱা দেখা গৈছে৷
সমজিলা সমূহত দেখা দিয়া এই সমস্যাৰ প্ৰতি চৰকাৰে দেখিও নেদেখাৰ ভাও ধৰাটো দুৰ্ভাগ্যজনক কথা ৷ আনহাতে সমজিলা সমূহত থকা নিৰ্বাচন বিষয়াৰ কাৰ্যালয়তে পূৰ্বে বিভিন্ন প্ৰাৰ্থীয়ে মনোনয়ন পত্ৰ দাখিল কৰিছিল যদিও বৰ্তমান কোনো সমজিলাতে এনে কাৰ্যালয় নথকাৰ বাবে জিলা নিৰ্বাচন বিষয়াৰ কাৰ্যালয়ৰ পৰাই নিৰ্বাচন সম্বন্ধীয় সকলো কাম সম্পন্ন হোৱাত নিৰ্বাচনৰ সময়ত খদমদমাই থকা পূৰ্বৰ মহকুমাধিপতি তথা বৰ্তমানৰ সমজিলা আয়ুক্তৰ কাৰ্যালয় সমূহ এলাগী হৈ পৰা দেখা গৈছে৷ তৃণমূল পৰ্যায়ৰলৈকে ক্ষমতাৰ বিকেন্দ্ৰীকৰণৰ কথা কোৱা চৰকাৰৰ দিনত সমজিলাৰ নিৰ্বাচন কাৰ্যালয় সমূহ জিলা কাৰ্যালয়ৰ লগত সংলগ্ন কৰি যিকোনো তথ্যৰ বাবে জিলালৈ বাট চাবলগীয়া হোৱা কাৰ্যই বিকেন্দ্ৰীকৰণৰ মূল ধাৰণাকেই কুঠাৰাঘাত কৰা যেনহে বোধ হয়৷
