নিউজডেক্স, ২১ ফেব্ৰুৱাৰী, ২০২৩: খেল-ধেমালিয়েও মানুহক সমাজৰ উত্তৰণৰ হকে কাম কৰিবলৈ অনুপ্ৰাণিত কৰিব পাৰে । এই কথা প্ৰতিপন্ন কৰিবলৈ সক্ষম হৈছে শিৱসাগৰ জিলাৰ নামতিৰ কেইজনমান যুৱকে । দুখীয়া ছাত্ৰ-ছাত্ৰী আৰু ৰোগীক সহায় কৰাৰ মানসেৰে তেওঁলোকে যোৱা চৈধ্য বছৰ ধৰি নামতি অঞ্চলত এখন বাৰ্ষিক মেগা প্ৰাইজমনি দিবা-নৈশ ক্ৰিকেট প্ৰতিযোগিতা অনুষ্ঠিত কৰি বিভিন্ন মহলৰ দৃষ্টি আকৰ্ষণ কৰিছে ।
যুৱক কেইজনৰ প্ৰচেষ্টাত গঢ় লৈ উঠা নামতি চাৰিআলি যুৱ সমাজৰ উদ্যোগত স্থানীয় মেট্ৰ’ ক্লাবৰ সহযোগত দিবা-নৈক্ষ ক্ৰিকেট প্ৰতিযোগিতা খনৰ ১৫তম সংস্কৰণ বৰ্তমান নামতি অঞ্চলত হাজাৰ হাজাৰ ক্ৰিকেট অনুৰাগীৰ উপস্থিতিত অনুষ্ঠিত কৰা হৈছে । যোৱা ১৭ ফেব্ৰুৱাৰীত আৰম্ভ হোৱা প্ৰতিযোগিতাখন ২৩ ফেব্ৰুৱাৰীত অন্ত পৰিব । তেজপুৰ, গোলাঘাট, হোজাই, শিৱসাগৰ আদিকে ধৰি অসমৰ বিভিন্ন অঞ্চলৰ পৰা অহা ৩২ টা দলে এই প্ৰতিযোগিতাখনত অংশগ্ৰহণ কৰিছে । বতৰে বিধি-পথালি নিদিলে প্ৰতিযোগিতাৰ চুড়ান্ত খেলখন ২৩ ফেব্ৰুৱাৰীত অনুষ্ঠিত হ’ব । প্ৰায় ১৫ লাখ টকাৰ বাজেটৰ প্ৰতিযোগিতাখনৰ প্ৰাইজমনি হ’ল ৫ লাখ টকা । ক্ৰিকেট প্ৰতিযোগিতাখনৰ এক অন্যতম আকৰ্ষণ হ’ল ভাৰতৰ টেনিছ ব’ল ক্ৰিকেট দলৰ অধিনায়ক অংকুৰ সিং যি শিৱসাগৰ এম ছিক্স ইলেভেন দলৰ হৈ প্ৰতিযোগিতাত অৱতীৰ্ণ হৈছে । জনপ্ৰিয় গায়ক জুবিন গাৰ্গে ইতিমধ্যে প্ৰতিযোগিতা খনলৈ শুভেচ্ছা বাণী প্ৰেৰণ কৰিছে ।
