পেঞ্চন নীতি সন্দৰ্ভত প্ৰাক্তন সৈনিকৰ দ্বাৰা সাংসদ তপন গগৈৰ যোগেদি দেশৰ ৰাষ্ট্ৰপতি, প্ৰধানমন্ত্ৰী আৰু প্ৰতিৰক্ষা মন্ত্ৰীলৈ স্মাৰকপত্ৰ প্ৰেৰণ

নিউজ ডেক্স, ০১ মে ২০২৩ : যোৱা ৩০ এপ্রিলৰ দিনা প্ৰাক্তন সৈনিক সকলে One Rank One Pension(OROP) প্ৰদান কৰোতে হোৱা বিসংগতি বিলাক দূৰ কৰিবৰ বাবে সম্পূর্ণ ভাৰতবৰ্ষত প্ৰাক্তন সৈনিক, বীৰ নাৰী, শ্বহীদ সৈনিকৰ বিধৱা সকলে নিজ নিজ অঞ্চলৰ লোকসভা সাংসদ সকলৰ যোগেদি ভাৰতৰ মহামহিম ৰাষ্ট্ৰপতি, প্ৰধানমন্ত্ৰী আৰু প্ৰতিৰক্ষা মন্ত্রী লৈও স্মাৰক পত্ৰ প্ৰেৰণ কৰে। গোটেই ভাৰত জুৰি হোৱা স্মাৰক পত্ৰ প্ৰদান কাৰ্যক্ৰমৰ লগত সংগতি ৰাখি যোৰহাট, শিৱসাগৰ আৰু চৰাইদেউ জিলাৰ প্ৰাক্তন সৈনিক, বীৰ নাৰী আৰু শ্বহীদ সৈনিকৰ বিধৱা সকলে যোৰহাট লোকসভা সমষ্টিৰ সাংসদ শ্ৰী তপন কুমাৰ গগৈক চফ্ৰাইৰ মুকলি মঞ্চত ‘ভাৰত মাতা কী জয়’, ‘বন্দে মাতৰম্’ ধ্বনি দি দলে-বলে গৈ স্মাৰক পত্ৰ প্ৰদান কৰে। স্মাৰক পত্ৰ গ্ৰহণৰ অন্তত সাংসদ গৰাকীয়ে প্ৰাক্তন সৈনিক সকলক স্মাৰক পত্ৰত উল্লেখিত ১৬টা বিষয় সদনত আলোচনা কৰাৰ আশ্বাস প্ৰদান কৰে।