‘কাজী নেমু’ক ৰাজ্যিক ফল হিচাপে ঘোষণা ৰাজ্য চৰকাৰৰ

নিউজডেক্স, ১৩ ফেব্ৰুৱাৰী ২০২৪  : অসম চৰকাৰে মঙলবাৰে ‘কাজী নেমু’ (চাইট্ৰাছ নেমু)ক ৰাজ্যিক ফল হিচাপে ঘোষণা কৰে।’কাজি নেমু’ ইয়াৰ অনন্য সুগন্ধি আৰু স্বাস্থ্য উপকাৰীতাৰ বাবে সুপৰিচিত আৰু ইয়াত ভৌগোলিক সূচক (GI) টেগ থাকে৷কেবিনেটৰ সিদ্ধান্ত অনুসৰি ৰাজ্যৰ বিধানসভাত এই ঘোষণা কৰে কৃষি মন্ত্ৰী অতুল বৰাই।“কালি কেবিনেট বৈঠকত ‘কাজী নেমু’ক অসমৰ ৰাজ্যিক ফল হিচাপে অনুমোদন জনোৱা হৈছে। আমাৰ চৰকাৰৰ এয়া এক প্ৰশংসনীয় সিদ্ধান্ত” বুলি মন্ত্ৰী অতুল বৰাই কয়৷বৰাই কয় যে ২০১৬ চনত এই ফলটোৱে জি আই টেগ লাভ কৰিছিল আৰু ৰাজ্যখনত বাণিজ্যিকভাৱেও ইয়াৰ খেতি কৰাৰ লগতে ইয়াৰ ৰপ্তানিও কৰা হৈছে।“কাজী নেমুৰ বাণিজ্যিক বাগিচা কৰা হৈছে। ৰাজ্যৰ ১৫.৯০ হেক্টৰ মাটিত কাজী নেমুৰ খেতি কৰা হয় আৰু ইয়াৰ  উৎপাদন ১.৫৮ মেট্ৰিক টন। যোৱা দুবছৰত এই ফল মধ্যপ্ৰাচ্যকে ধৰি বিশ্বৰ কেইবাখনো দেশলৈ কাজী নেমু ৰপ্তানি কৰা হৈছে”। , তেওঁ কয়।বিশেষকৈ ৰোগ প্ৰতিৰোধ ক্ষমতা বৃদ্ধি আৰু খাদ্যত এক অনন্য সোৱাদ অনাৰ ক্ষেত্ৰতো কাজী নেমুৰ বিশেষ গুণৰ ওপৰত গুৰুত্ব আৰোপ কৰে মন্ত্ৰীগৰাকীয়ে।সামাজিক মাধ্যম  এক্সত মন্ত্ৰীজনে  উল্লেখ কৰে— “আমাৰ চৰকাৰে কাজী নেমু (চাইট্ৰাছ লিমন)ক অসমৰ ৰাজ্যিক ফল হিচাপে ঘোষণা কৰাৰ সিদ্ধান্ত লৈছে। ইয়াৰ অনন্য সুগন্ধি আৰু এন্টিঅক্সিডেন্ট গুণেৰে অসম নেমুয়ে আমাৰ স্থানীয় খাদ্য সম্ভাৰ সমৃদ্ধ কৰিছে।”ইফালে মুখ্যমন্ত্ৰী হিমন্ত বিশ্ব শৰ্মাই কয় যে কাজী নেমুক ৰাজ্যিক ফল হিচাপে ঘোষণা কৰাৰ সিদ্ধান্তই ফলটোক বিশ্বজুৰি অধিক প্ৰাধান্য লাভ কৰাত সহায় কৰিব।এই ঘোষণাৰ জৰিয়তে ই বিশ্বৰ ফলৰ মানচিত্ৰত জিলিকি উঠাৰ  উপৰিও আমাৰ কৃষকৰ আত্মনিৰ্ভৰশীলতা আৰু উৎপাদনশীলতা বৃদ্ধি কৰিব বুলি মুখ্যমন্ত্ৰীয়ে লগতে কয়।