আজি এদিনীয়া কাৰ্য্যসূচীৰে শিৱসাগৰ হাঁহচৰা লাটুম গাঁৱত দ্বিতীয় লাটুম বৰুৱা বংশাৱলী সন্মিলন অনুষ্ঠিত কৰা হৈছে

নিউজডেক্স,৩০ মাৰ্চ,২০২৪ : অসমৰ বিভিন্ন প্ৰান্তৰ পৰা আজি হাঁহচৰা লাটুম গাঁৱত আহি উপস্থিত হৈছে লাটুম বৰুৱাৰ বংশধৰ সকল। দিনযোৰা কাৰ্যসূচীৰে আজি অনুষ্ঠিত কৰা হৈছে লাটুম বৰুৱাৰ বংশাৱলীৰ কাৰ্যক্ৰম। লাটুম গাঁৱৰ মধ্য স্থলত মূল মণ্ডপৰ লগতে ঐতিহাসিক কাঠবৰুৱা পুখুৰী পাৰত টাই আহোমৰ  ধৰ্মীয় ৰীতি-নীতিৰে এই দ্বিতীয় লাটুম বৰুৱা বংশাৱলী অনুষ্ঠিত হৈছে।ধেমাজি,নামতি,মিছাজান,সাপেখাতী ইত্যাদি অঞ্চলত বাস কৰা লাটুম বৰুৱা বংশৰ সহস্ৰাধিক লোক আহি সমবেত হৈছে এই অনুষ্ঠানত।টাই আহোম সাম্ৰাজ্যৰ প্ৰতিষ্ঠাপক মহান চাওলুং চাওলুং ছ্যুকাফাৰ অতি বিশ্বাসী সহচৰ লুক্‌-খা-খুনসকলৰ মাজতেই অংকুৰিত হৈছিল লাটুমৰ তেজ।দেশ জাতিৰ দুৰ্দিনত টাই আহোমৰ বহু সাহসী,দেশপ্ৰেমিক যুদ্ধাই লাচিত বৰফুকন আৰু আতন বুঢ়াগোহাঁইৰ নেতৃত্বত বিখ্যাত শৰাইঘাট যুদ্ধত,জীৱন পণ কৰিছিল।শৰাইঘাট যুদ্ধৰ পালি সেনাপতি লাটুম বৰুৱাই ৰাঙলী বুৰুজ আৰু পাৰঘোপৰ মাজত  কামাখ্যা মন্দিৰলৈ যোৱা বাটৰ পশ্চিমৰ পৰা দুৱাৰ গৰিলালৈকে যুদ্ধক্ষেত্ৰত অংশগ্ৰহণ কৰি বীৰত্বৰ পৰিচয় দিছিল।এই শৰাইঘটীয়া বীৰ লাটুম বৰুৱাৰ  ঐতিহ্য আৰু কীৰ্তিচিহ্ন বিজড়িত শিৱসাগৰৰ হাঁহচৰা লাটুম গাঁৱত আজি অনুষ্ঠিত কৰা হৈছে বীৰজনাৰ বংশধৰ সকলৰ দ্বিতীয় লাটুম বৰুৱা বংশাৱলী।