“সাংবাদিক সকল নিৰ্জন দ্বীপৰ বাসিন্দা নহয়”— হাইদৰ হুছেইন

নিউজডেক্স,৯এপ্ৰিল,২০২৪ : জ্যেষ্ঠ সাংবাদিক তথা সমালোচক হাইদৰ হুচেইনৰ সৈতে হোৱা আমাৰ এক আছুতীয়া সাক্ষাৎকাৰত সাম্প্ৰতিক সময়ত সাংবাদ জগতৰ অৱক্ষয় সন্দৰ্ভত সোধা এক প্ৰশ্নৰ উত্তৰত তেখেতে ইয়াক  সমাজৰ সামগ্ৰিক অৱক্ষয়ৰ প্ৰতিফলন বুলি কয়৷ তেখেতৰ মতে সংবাদ মাধ্যমক গণতন্ত্ৰৰ চতুৰ্থ স্তম্ভ বুলি কোৱা হয় যদিও বৰ্তমান গণতন্ত্ৰৰ আন তিনিওটা স্তম্ভতে অৱক্ষয় পৰিলক্ষিত হৈছে৷  সাধাৰণতে দেশৰ প্ৰচলিত আইন আৰু শাসন ব্যৱস্থাৰ পৰা সাংবাদিকতা বিচ্ছিন্ন হ’ব নোৱাৰে আৰু সমাজৰ সামগ্ৰিক স্খলনৰ প্ৰভাৱৰ হেতু আজি দেশৰ তদন্তকাৰী সংস্থা ই-ডি, চি-বি-আই আদিও পথচ্যুত হোৱাৰ বাতৰি ওলাইছে৷ সাংবাদিক সকলো আজি বহু বাধ্য বাধকতাৰ মাজত সোমাই পৰিছে ৷ শেষতীয়াভাবে বিভিন্ন কাৰণত  দেশৰ মূল সুতিৰ সংবাদ মাধ্যম চৰকাৰ নিৰ্ভৰশীল হ’বলগীয়া হৈছে৷ ইয়াৰ বাবে কেৱল প্ৰচাৰ মাধ্যমৰ মালিক কৰ্তৃপক্ষক দোষ দি লাভ নাই৷ সামগ্ৰিক ভাবে আজি দেশত সংবিধান মানি চলাৰ প্ৰৱণতা হ্ৰাস পাইছে ৷সেয়েহে সাংবাদিকতাও বহুক্ষেত্ৰত পথচ্যুত হৈছে৷ সাম্প্ৰতিক সময়ৰ ৰাজনীতি হ’ল ক্ষমতা সৰ্বস্ব ৰাজনীতি ,ইয়াত মূল্যবোধ বা ত্যাগৰ কথা নাই আৰু ৰাজনীতিয়েই সমাজৰ মূল চালিকাশক্তি ৷সেয়েহে বৰ্তমান সময়ত ৰাজনীতিৰ লগতে সংবাদ মাধ্যমৰো অৱক্ষয় পৰিলক্ষিত হৈছে আৰু মানুহৰ মাজত অসন্তুষ্টি বাঢ়িছে৷ বৰ্তমানৰ এই হতাশজনক পৰিস্থিতিৰ পৰা মুক্তি পাবৰ বাবে সমাজ সচেতন ৰাইজে বিবেক বিবেচনাৰ দ্বাৰা মানুহ আৰু জাতিৰ প্ৰতি থকা দায়বদ্ধতাৰ প্ৰতি সচেতন হ’লে নিৰাশাৰ মাজতো আশাৰ সঞ্চাৰ হোৱাৰ এক বাতাবৰণ সৃষ্টি হ’ব বুলি কয় বিশিষ্ট সাংবাদিক গৰাকীয়ে ৷