ঐতিহাসিক গড়গাঁও ৰাজ কাৰেঙৰ বাকৰিত তাই মলুঙৰ জাতিংফা পূজা। দুশ মলুঙক তাই আহোম উন্নয়ন পৰিষদৰ উদ্যোগত এককালীন সাহাৰ্য প্ৰদান।

নিউজডেক্স,৬ জানুৱাৰী,২০২৪ : ছশ বছৰীয়া আহোম ৰাজত্ব কালৰ সোণালী স্বাক্ষৰ বহন কৰা নাজিৰাৰ ঐতিহাসিক গড়গাঁও কাৰেঙঘৰৰ বাকৰিত তাই ধৰ্মীয় ৰীতি – নীতিৰে আজি অনুষ্ঠিত হয় জাতিংফা পূজা। অসমৰ বিভিন্ন প্ৰান্তৰ পৰা সমবেত হোৱা টাই পণ্ডিত তথা মলুঙ সকলে পুলিন পোথাও সকলক শ্ৰদ্ধাঞ্জলি নিবেদন কৰাৰ লগতে জাতিংফা  পূজা অৰ্চনাত টাই আহোমৰ ঐতিহ্য, পৰম্পৰাক আধ্যাত্মিক চেতনাৰে ঐতিহাসিক গড়গাঁও ৰাজকাৰেঙঘৰ বাকৰি বিৰাজমান হৈ পৰে।ইয়াৰ পিছতে আজি টাই আহোম উন্নয়ন পৰিষদৰ তৰফৰ পৰা মুখ্যমন্ত্ৰী বিশেষ এককালীন সাহাৰ্য্য ৰূপে ২০০ জন মলুঙক ৩০ হাজাৰকৈ টকাৰ চেক প্ৰদান কৰা হয়। তাই আহোম উন্নয়ন পৰিষদৰ অধ্যক্ষ ময়ুৰ বৰগোঁহায়ে আঁত-ধৰা এই সাহাৰ্য্য প্ৰদান অনুষ্ঠানত  অসম চৰকাৰৰ কেবিনেট মন্ত্ৰী যোগেন মহন, যোৰহাট লোকসভা সমষ্টিৰ সাংসদ তপন কুমাৰ গগৈ, ৰাজ্যসভাৰ সাংসদ পবিত্ৰ মাৰ্ঘেৰিটা, কামাখ্যা প্ৰসাদ তাছা, সোণাৰী সমষ্টিৰ বিধায়ক ধৰ্মেশ্বৰ কোঁৱৰ, মৰাণ সমষ্টিৰ বিধায়ক চক্ৰধৰ গগৈ,  শিৱসাগৰ জিলাৰ আয়ুক্ত আদিত্য বিক্ৰম যাদৱ , তাই আহোম উন্নয়ন পৰিষদৰ উপাধ্যক্ষদ্বয় ডঃযোগেন্দ্ৰ নাথ বৰগোঁহাই, ৰুহিনী মহনৰ লগতে বহুকেইজন গন্য- মান্য ব্যক্তি উপস্থিত থাকে।